აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს ორგანიზებით, სამედიცინო ცენტრ „დიომედის“ გლდანის ფილიალში აფხაზეთიდან დევნილ პირებს უფასო მრავალპროფილური სკრინინგული გამოკვლევები ჩაუტარდათ, სადაც აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე აფხაზეთის ჯანმრთელობისა და სოციალური დაცვის ახალდანიშნულ მინისტრ ბესიკ კუსიდისთან ერთად იმყოფებოდა.

დევნილ ბენეფიციარებს შესაძლებლობა ჰქონდათ 10-მდე სხვადასხვა პროფილის მაღალკვალიფიციურ ექიმთან კონსულტაცია გაევლოთ და სხვადასხვა დიაგნოსტიკური კვლევები სრულიად უფასოდ ჩაეტარებინათ.

ვიზიტის ფარგლებში, მთავრობის თავმჯდომარე სამედიცინო დაწესებულების ხელმძღვანელობას და მედპერსონალს შეხვდა.

„აფხაზეთის მთავრობის უმნიშვნელოვანესი ამოცანაა ჯანდაცვის სერვისების ხელმისაწვდომობის გაზრდა ისეთ ტერიტორიულ ერთეულებში, სადაც დევნილი მოსახლეობის სიმჭიდროვე მაღალია. სწორედ ამიტომ, სამინისტრო სისტემატურად ახორციელებს უფასო სკრინინგულ გამოკვლევებს, რათა თითოეულ დევნილს მიეცეს შესაძლებლობა დროულად მიიღოს საჭირო სამედიცინო დახმარება.“ – განაცხადა გიორგი ჯინჭარაძემ.

შეხვედრაში ასევე აფხაზეთის ჯანმრთელობისა და სოციალური დაცვის მინისტრის პირველი მოადგილე მანონა გეჯუა და სამედიცინო ცენტრ „დიომედის“ გენერალური დირექტორი ნათია ფარცვანია მონაწილეობდნენ.

მსგავსი აქტივობები და ვიზიტები სამედიცინო ცენტრის ფილიალებში მთელი საქართველოს მასშტაბით გაგრძელდება.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ შინდისში, 2008 წლის აგვისტოს ომის დროს დაღუპული 17 გმირის ხსოვნისადმი მიძღვნილი მემორიალი გვირგვინით შეამკო და მათ ხსოვნას პატივი მიაგო.

მთავრობის თავმჯდომარე ასევე დაღუპული გმირების სულის მოსახსენებელ პანაშვიდს დაესწრო, რომელიც გორისა და ატენის მიტროპოლიტმა ანდრიამ სასულიერო პირებთან ერთად გადაიხადა.

დღესვე გიორგი ჯინჭარაძე გაეცნო შინდისის გმირების მემორიალური კომპლექსის არქიტექტურულ კონცეფციას, პროექტს და მიმდინარე სამშენებლო სამუშაოებს.

გმირთა მემორიალთან საქართველოს პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, პრეზიდენტი მიხეილ ყაველაშვილი, საქართველოს აღმასრულებელი და საკანონმდებლო ხელისუფლების წარმომადგენლები და დაღუპულთა ოჯახის წევრებიც იმყოფებოდნენ.

შინდისის ბრძოლიდან 17 წელი გავიდა. 2008 წლის 11 აგვისტოს რუსულ სამხედრო ნაწილთან უთანასწორო შეტაკების დროს 17 ქართველი ჯარისკაცი გმირულად დაიღუპა.

აფხაზეთის ავტონომიური რესპუბლიკის განათლებისა და კულტურის მინისტრი ბექა ღვაჩლიანი, აფხაზეთის ა/რ მთავრობის თავმჯდომარე გიორგი ჯინჭარაძესთან ერთად, შაორის ახალგაზრდული ბანაკის დახურვის ცერემონიას დაესწრო.

ბანაკი აფხაზეთის კულტურის, სპორტის და ახალგაზრდულ საქმეთა სააგენტოს ორგანიზებითა და საქართველოს ახალგაზრდობის სააგენტოს მხარდაჭერით გაიმართა, სადაც 100-მდე აფხაზეთიდან დროებით დევნილმა ახალგაზრდამ მიიღო მონაწილეობა.

ხუთდღიანი საბანაკე პროგრამის ფარგლებში, ახალგაზრდებმა სხვადასხვა საგანმანათლებლო, სპორტულ და შემეცნებით აქტივობებში მიიღეს მონაწილეობა, რაც ხელს უწყობს მათი ფიზიკური და ინტელექტუალური უნარების განვითარებას, ღონისძიების დასასრულს, სხვადასხვა სპორტულ აქტივობაში გამარჯვებული მონაწილეები დაჯილდოვდნენ.

ბანაკის კულმინაციური ღონისძიება კითხვა-პასუხის რეჟიმში წარიმართა, სადაც აფხაზეთის მთავრობის წარმომადგენლებმა ბანაკის მნიშვნელობასა და მის აუცილებლობაზე ისაუბრეს.

ბანაკი ხელს უწყობს ახალგაზრდების სრულფასოვან დასვენებას, არაფორმალურ განათლებასა და თვითშემეცნებას. პროგრამა განსაკუთრებით მნიშვნელოვანია მათი დამოუკიდებელი სოციალური ინტეგრაციისთვის, ჯანსაღი ცხოვრების წესის დამკვიდრებისთვის, ეთიკის, კომუნიკაციისა და გუნდური მუშაობის უნარების განვითარებისათვის.

ღონისძიებას ახალგაზრდობის სააგენტოს ხელმძღვანელის მოვალეობის შემსრულებელი ვახტანგ ბააკაშვილი, აფხაზეთის იუსტიციისა დაუ სამოქალაქო  ინტეგრაციის მინისტრი ალიონა ჩხოტუა, აფხაზეთის კულტურის, სპორტის და ახალგაზრდობის სააგენტოს წარმომადგენლები და სხვა სტუმრები ესწრებოდნენ.

აფხაზეთის ავტონომიური რესპუბლიკის მთავრობის, აფხაზეთის კულტურის, სპორტის და ახალგაზრდულ საქმეთა სააგენტოს ორგანიზებითა და საქართველოს ახალგაზრდობის სააგენტოს მხარდაჭერით, აფხაზეთიდან დევნილ ახალგაზრდებს შაორის ახალგაზრდულმა ბანაკმა უმასპინძლა.

ბანაკის დახურვის ცერემონიას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, აფხაზეთის განათლებისა და კულტურის მინისტრი ბექა ღვაჩლიანი, აფხაზეთის იუსტიციისა და სოციალური ინტეგრაციის მინისტრი ალიონა ჩხოტუა და ახალგაზრდობის სააგენტოს დირექტორის მოვალეობის შემსრულებელი ვახტანგ ბააკაშვილი ესწრებოდნენ.

პროექტში აფხაზეთიდან დევნილი, 100-მდე ახალგაზრდა მონაწილეობდა, რომლებიც ხუთდღიანი პროგრამის ფარგლებში ჩაერთნენ მრავალფეროვან საგანმანათლებლო, სპორტულ და შემეცნებით აქტივობებში, რაც ხელს უწყობს მათი ფიზიკური, ინტელექტუალური და სოციალური უნარების განვითარებას.

ღონისძიება კითხვა-პასუხის რეჟიმში წარიმართა, სადაც ახალგაზრდებმა თავიანთი მოსაზრებები, ინიციატივები და გამოცდილება გააზიარეს. აფხაზეთის მთავრობის წევრებმა სიტყვით მიმართეს ბანაკის მონაწილეებს და გამოთქვეს მზადყოფნა, მომავალშიც ხელი შეუწყონ ახალგაზრდების სამოქალაქო ჩართულობასა და განვითარებას.

დასასრულს სხვადასხვა სპორტულ და შემოქმედებით აქტივობებში გამარჯვებული მონაწილეები სპეციალური პრიზებით დაჯილდოვდნენ.

აჭარის ხელოვნების მუზეუმში „საერთაშორისო პლენერი მშვიდობისთვის 2025“-ის ფარგლებში შემაჯამებელი გამოფენა მოეწყო, რომელსაც აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო. მთავრობის თავმჯდომარემ მთავრობის წევრებთან ერთად დაათვალიერა და გაეცნო გამოფენაზე წარმოდგენილ ნამუშევრებს.

გამოფენას ასევე ესწრებოდნენ აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი, აფხაზეთის იძულებით გადაადგილებულ პირთა მინისტრი დავით ფაცაცია, აჭარის კულტურის მინისტრი ელისო ბოლქვაძე, აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის განათლებისა და კულტურის მინისტრი ბექა ღვაჩლიანი, ადგილობრივი თვითმმართველობის წარმომადგენლები და მოწვეული სტუმრები.

გამოფენაზე წარმოდგენილი იყო საერთაშორისო პლენერში მონაწილე ხელოვანების ნამუშევრები, რომლებიც საიუბილეო პლენერის ფარგლებში აჭარაში, სხვადასხვა ლოკაციაზე შეიქმნა.

პროექტი „საერთაშორისო პლენერი მშვიდობისთვის 2025“ 4-9 აგვისტოს პერიოდში გაიმართა აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ორგანიზებით და „შავი ზღვის ქვეყნების მხატვართა საერთაშორისო გაერთიანება პლენერი-20“-ის და აჭარის ავტონომიური რესპუბლიკის კულტურის სამინისტროს მხარდაჭერით.

პროგრამის მიზანია დევნილი მხატვრების დაახლოება, მათი ინტეგრაციის ხელშეწყობა და მომავალში ერთობლივ პროექტებში მონაწილეობის მოტივაციის ამაღლება.

ღონისძიების ფარგლებში სსიპ „აფხაზეთის სავაჭრო-სამრეწველო პალატის“ ორგანიზებით ახალგაზრდა დევნილი მეწარმეების ნამუშევრების გამოფენა-გაყიდვაც გაიმართა.

აფხაზეთის ფინანსთა და ეკონომიკის მინისტრმა თენგიზ ნასარიძემ მუხათგვერდის ძმათა სასაფლაოზე, მთავრობის თავმჯდომარე გიორგი ჯინჭარაძესთან, უმაღლესი საბჭოს თავმჯდომარესთან ჯემალ გამახარიასთან, მთავრობის წევრებთან და უმაღლესი საბჭოს დეპუტატებთან ერთად 2008 წლის ომის 17 წლისთავთან დაკავშირებით, დაღუპულ გმირთა ხსოვნას პატივი მიაგო.

რუსეთ-საქართველოს 2008 წლის აგვისტოს ომიდან 17 წელი გავიდა. 5-დღიან საომარ მოქმედებებს 400-ზე მეტი ადამიანის სიცოცხლე შეეწირა, მათ შორის 170 – სამხედრო, შსს-ს 19 თანამშრომელი, 244 – სამოქალაქო პირი, დაიჭრა 2 234 ადამიანი, 26 000 კი დევნილად იქცა.

აფხაზეთის ავტონომიური რესპუბლიკის მთავრობის წევრებმა აფხაზეთის უმაღლესი საბჭოს დეპუტატებთან ერთად მუხათგვერდის ძმათა სასაფლაოზე 2008 წლის რუსეთ-საქართველოს ომში დაღუპულთა ხსოვნას პატივი მიაგეს.

როგორც მთავრობის თავმჯდომარემ გიორგი ჯინჭარაძემ აღნიშნა, საქართველოს მთავრობის სწორი, თანმიმდევრული და სამშვიდობო პოლიტიკით საქართველო აუცილებლად იქნება ერთიანი.

"დღევანდელი დღე საქართველოს ისტორიაში უმძიმესი დღე არის, მინდა, პატივი მივაგო გმირების ხსოვნას, რომლებმაც ჩვენი ქვეყნის გამო თავი გაწირეს, ქედს ვიხრი მათ წინაშე. ის იდეა, რისთვისაც ეს ადამიანები დაიღუპნენ, დარწმუნებული ვარ, საქართველოს მთავრობის სწორი, მიზანმიმართული, თანმიმდევრული, სამშვიდობო პოლიტიკით აუცილებლად იქნება აღსრულებული და საქართველო იქნება ერთიანი. აფხაზეთის მთავრობა სამშვიდობო ინიციატივების კუთხით აქტიურად გააგრძელებს მუშაობას. დიდება გმირებს, დიდება მათ ხსოვნას", - განაცხადა ჯინჭარაძემ.

რუსეთ-საქართველოს 2008 წლის აგვისტოს ომიდან 17 წელი გავიდა. 5-დღიან საომარ მოქმედებებს 400-ზე მეტი ადამიანის სიცოცხლე შეეწირა, მათ შორის 170 – სამხედრო, შსს-ს 19 თანამშრომელი, 244 – სამოქალაქო პირი, დაიჭრა 2 234 ადამიანი, 26 000 კი დევნილად იქცა.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე აფხაზეთის  იუსტიციისა და სამოქალაქო ინტეგრაციის მინისტრ ალიონა ჩხოტუასთან ერთად სახელმწიფო გრანტის მართვის სააგენტოს თავმჯდომარე თამარ ზოდელავას შეხვდა.

გაცნობითი ხასიათის შეხვედრაზე მხარეებმა სამომავლო თანამშრომლობის შესაძლებლობები და სააგენტოს საქმიანობის ძირითადი მიმართულებები განიხილეს.

აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ სოხუმის სახელმწიფო უნივერსიტეტის ახალ რექტორთან თეა ჯუღელთან სამუშაო შეხვედრა გამართა.

შეხვედრაზე მხარეებმა იმსჯელეს სოხუმის სახელმწიფო უნივერსიტეტის როლზე ისტორიული მეხსიერების დაცვასა და იმ მნიშვნელოვან მისიაზე, რომელსაც უნივერსიტეტი ასრულებს ქვეყნის საგანმანათლებლო და სამეცნიერო სივრცეში. ასევე, განიხილეს სამომავლო თანამშრომლობის მიმართულებები და ერთობლივი აქტივობების განხორციელების შესაძლებლობები.

გიორგი ჯინჭარაძე შეხვედრის ფარგლებში უნივერსიტეტის პროფესორ-მასწავლებლებსაც ესაუბრა. შეხვედრის მთავარი აქცენტი ახალგაზრდების ჩართულობის გაზრდაზე გაკეთდა, განსაკუთრებით სამშვიდობო პროცესებსა და ქართულ-აფხაზური დიალოგის გაღრმავების კუთხით.

მთავრობის თავმჯდომარემ მადლობა გადაუხადა უნივერსიტეტის აკადემიურ საზოგადოებას მრავალწლიანი პედაგოგიური მოღვაწეობისა და სამაგალითო პროფესიონალიზმისთვის.

აფხაზეთის ავტონომიური რესპუბლიკის ჯანმრთელობისა და სოციალური დაცვის მინისტრის თანამდებობაზე ბესიკ კუსიდი დაინიშნა.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ მინისტრი სამინისტროს თანამშრომლებს წარუდგინა და მადლობა გადაუხადა გაწეული საქმიანობისთვის. მთავრობის თავმჯდომარემ ხაზგასმით აღნიშნა ჯანდაცვის სისტემის გაუმჯობესებისა და დევნილი მოსახლეობისთვის სამედიცინო სერვისებზე ხელმისაწვდომობის უზრუნველყოფის მნიშვნელობა.

ბესიკ კუსიდი 1985 წელს სოხუმში დაიბადა. განათლება მიღებული აქვს ბიზნესის ადმინისტრირების მიმართულებით. მას საჯარო სექტორში მუშაობის მრავალწლიანი გამოცდილება აქვს. სხვადასხვა პერიოდში მნიშვნელოვან მენეჯერულ და ადმინისტრაციულ პოზიციებზე საქმიანობდა.

აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ საქართველოს კულტურის მინისტრ თინათინ რუხაძეს და მინისტრის მოადგილე გიორგი მირცხულავასთან კულტურის სამინისტროში პირველი ოფიციალური შეხვედრა გამართა.

შეხვედრისას მთავრობის თავმჯდომარემ ხაზი გაუსვა ოკუპირებულ ტერიტორიებთან დაკავშირებული კულტურული მემკვიდრეობის დაცვისა და შენარჩუნების მნიშვნელობას.

მხარეებმა ასევე ისაუბრეს სამომავლო თანამშრომლობის შესაძლებლობებზე დევნილი საზოგადოების კულტურულ ცხოვრებაში ჩართულობის ხელშეწყობის მიმართულებით.

საქართველოს განათლების, მეცნიერებისა და ახალგაზრდობის სამინისტრომ განათლების საერთაშორისო ცენტრის 2025-2026 აკადემიური წლის სტიპენდიატებს უმასპინძლა. ღონისძიებას აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე დაესწრო.

საქართველოს განათლების, მეცნიერებისა და ახალგაზრდობის მინისტრმა გივი მიქანაძემ სტიპენდიატებს მიღწეული წარმატება მიულოცა და საუკეთესო შედეგების მქონე სტუდენტს შესაბამისი სერტიფიკატი გადასცა.

სტიპენდიატთა მიღებაზე დამსწრე საზოგადოების წინაშე სიტყვით ასევე წარდგნენ სსიპ განათლების საერთაშორისო ცენტრის დირექტორი ნუნუ მიცკევიჩი, პარტნიორი ქვეყნების ელჩები და საელჩოების წარმომადგენლები.

2025-2026 სასწავლო წლისთვის განათლების საერთაშორისო ცენტრმა საზღვარგარეთ სწავლა 249 ახალგაზრდას დაუფინანსა, რომლებიც მსოფლიოს წამყვან უნივერსიტეტებში გააგრძელებენ ცოდნის მიღებას.

დაფინანსება გაიცა სხვადასხვა საერთაშორისო პროგრამის ფარგლებში: საერთაშორისო სამაგისტრო პროგრამები, საერთაშორისო სადოქტორო პროგრამები, საერთაშორისო სახელოვნებო აკადემიური პროგრამები, საზღვარგარეთ კვალიფიკაციის ამაღლების პროგრამა, სამაგისტრო პროგრამები საფრანგეთში France Excellence, ფულბრაიტის სამაგისტრო სასტიპენდიო პროგრამა, აკადემიური პროგრამები იტალიაში, აკადემიური პროგრამები სან-დიეგოს სახელმწიფო უნივერსიტეტში, სასტიპენდიო პროგრამები უნგრეთში Stipendium Hungaricum და სხვა.

ათონის მთაზე ვიზიტის ფარგლებში, აფხაზეთის ავტონომიური რესპუბლიკის მთავრობის თავმჯდომარის მოადგილე ანზორ მარგიანი და აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, ქალაქ სალონიკში საქართველოს გენერალურ კონსულთან გელა ჯაფარიძესთან ერთად, ივერონის მონასტრის წინამძღვარს არქიმანდრიტ ნათანაილს შეხვდნენ.

შეხვედრის მონაწილეებმა ივერონის მონასტერში დაცულ სიწმინდეებზე, მართლმადიდებელობაზე და რწმენაში ერთიანობაზე ისაუბრეს.

„მადლობას ვუხდი არქიმანდრიტ ნათანაილს გულთბილი მასპინძლობისთვის. ჩემთვის უდიდესი პატივი და ბედნიერება იყო, მისი ინიციატივით ივერონის მონასტრის საპატიო სტუმრების წიგნში ჩანაწერის გაკეთება.

საქართველო ვითარდება, მაგრამ ყველაფერთან ერთად მთავარია სულიერი განმტკიცება და სიძლიერე. ყოველთვის უნდა გვახსოვდეს, რომ ჩვენი სამშობლო ღმერთის რწმენით და სიყვარულით არის გადარჩენილი.

ჩვენ აფხაზეთში გვაქვს ჩვენი ახალი ათონი და იმედიანად ვარ განწყობილი, რომ უფლის წყალობით ძალიან მალე შევძლებთ გაერთიანებულ საქართველოში, ჩვენს ახალ ათონში წირვა-ლოცვას.“ - განაცხადა მინისტრმა დავით ფაცაციამ.

ივერონის მონასტრის წინამძღვარმა არქიმანდრიტმა ნათანაილმა ქართული დელეგაციის წევრები დალოცა, სიმტკიცე და სიძლიერე უსურვა.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, სამეგრელო-ზემო სვანეთის სახელმწიფო რწმუნებულ დავით ვერავასთან და ფოთის მერ ბექა ვაჭარაძესთან ერთად, ფოთის დევნილთა დასახლებაში იმყოფებოდა, სადაც აფხაზეთიდან იძულებით გადაადგილებულ მოსახლეობას შეხვდა.

ღონისძიების მიზანი იყო დევნილი ოჯახების საჭიროებების უშუალოდ მოსმენა და მათი ყოფითი და სოციალური მდგომარეობის შესახებ ინფორმაციის მიღება.

შეხვედრა დიალოგის ფორმატში წარიმართა. დევნილებმა მათთვის მნიშვნელოვან საკითხებზე ისაუბრეს და საკუთარი მოსაზრებები წარმოადგინეს.

მსგავსი შეხვედრები ხელს უწყობს მოსახლეობასთან კონსტრუქციული კომუნიკაციის დამყარებას და თითოეული დევნილი მოქალაქის საჭიროებაზე მორგებული სამომავლო განვითარების გეგმების დასახვას.